Member-only story
這幾日多左好多新聞，形容香港「寒冬將至」，民主和法治又死一次。其實本來都死左好耐，我係唔明點解要攞嚟講，名副其實是多鳩餘。
五年前，梁頌恆及游蕙禎被 DQ 嘅時候，沒有民主黨人為他們說話。因為，他們不是泛民的人。
梁天琦被 DQ 無得選的時候，也沒有民主黨人為他說話。因為他也不是泛民的人。當時正是 DQ 潮，所有人都只想自保，恨不得遠離本土和自決，越遠越好。
區諾軒被 DQ，他自己都好無可奈何地話，沒什麼可以做了。沒掙扎了。
放監出嚟之後，戴耀廷呢兩個月開始轉口風話法治已死，其實呢個係個好大的警號。一個和理非到願意坐監嘅人，也會講出這樣的話，證明局勢已經差得沒得再差。
到了呢個月，郭榮鏗被政府打開口牌話要 DQ，李柱銘、吳靄儀這些泛民元老被政治清算。泛民嘅元老都開始體會政敵被人打壓嘅待遇，咁先有民主黨人開始掙扎，覺得自己就義是為民主而犧牲。
就算唔計劉小麗同埋長毛，早就有大把人犧牲了，只是那不是你們的人。你地沒反應，要等到宜家燒到泛民身上先知痛。
當然，一直以來無反應，唔代表泛民唔知。泛民之所以唔出聲，好大機會係因為無將本土派當成是朋友，所以唔願意協助本土派爭回議席。
你可能會話，咁當時青年新政都無將泛民當是朋友，日日批評民主黨行禮如儀喔。呢點當然係——但亦只是證明左泛民嘅理論和理念，到底有幾脆弱。
自己友被人打壓的時候，就講咩中共打壓你，搬出各種冠冕堂皇嘅理論。梁游衝入議會廳，林卓廷指梁游「責無旁貸」；涂謹申要「是其是、非其非」。那些崇高的理論和理念去曬邊？原來梁游就唔係因為政府玩弄法律條文而輸？你地唔係應該要基於理念，幫呢兩個人咩？
當你主張民主，主張有公平的選舉權，認定中共政府干涉選舉結果是仆街，就麻煩要從一開始守住你嘅理念。呢個就是宜家好多人睇唔起泛民嘅理由。
