1.
「建設性批評」唔係索性叫過第二個人做，或者數你有咩問題，而係要你俾改善方法。亦即係，配得唔好嘅話可以點配，點學，由邊度做起，由咩地方改善。
批評之所以會有建設性，係因為你講完之後，對方會知道可以做咩。直接話「你配得咁難聽不如唔好配／搵過第二個人配」，等於勸退。數完你一堆但唔講清楚應該點改善，等於射後不理。
做唔到建議，最起碼可以做到嘅係，同情地理解點解會有呢個問題。齋屌係無撚用。
2.
如果一套作品或一個人會代表成個界別，通常都係因為兩個原因同時出現：呢個人或者作品好出名，同埋呢個界別無其他人夠呢個對象出名。唔想被人代表，淨係鬧作品，繼而切割，其實都唔夠。最好就係由提高界別裡其他人嘅知名度和個人特色，多D宣傳作品，避免被某件事某個人代表。
3.
會揀用演員，而唔係配音員，係錢作怪。其實大量相關嘅動漫畫作品已經講過，在日本選角嘅過程裡面，「演技」只係其中一個要素，日本早就以咩唱歌演戲電台節目MC雜談形象同埋既有名氣等等企劃能力考慮選角。《天氣之子》嘅選角就有 Marketing 嘅成分。
當然，香港同日本嘅聲優市場成熟程度唔可以同日而語。要在聲優實力之外還有其他技能，需要有呢種需求嘅市場。雀巢咖啡其實可以講話開左呢個先例。
4.
我知道香港有配音員同埋相關嘅配音迷。但係，在網路留言版（例如藍版）見得最多的，通常都係無謂人際關係花生，同埋配音迷之間嘅鬥嘴。
比起無止境嘅澄清同埋網路爭辯，比較現實嘅做法是用正面嘅事去覆蓋呢堆聲音。澄清反而會令更多人知道有呢堆新聞，遠遠不及你出 Post 傳教，帶出香港嘅配音員有咩值得欣賞嘅地方要實際。
類似嘅概念我已經講到口臭。就只係，唔知道點解雀巢咖啡呢單野係可以講到2046都仲有野可以寫，因為實在有太多莫名其妙嘅批評同埋意見。大概寫埋呢次就無了。
5.
最後，呢篇係廣東話寫。
我知道有唔少台灣人會睇我寫嘅野（Page 後台顯示有六成幾，我估實際數字會多好多）。不過我幾堅持呢篇要用廣東話，因為議題係香港本土嘅事。
成日都想講，如果觀眾或者 Fans 想多D創作者做本土創作，要咩字幕公司有本土字幕，你係唔應該主張咩本土情懷或者有咩本土文化，或者主張本土化成本極低，而應該主張本土有幾大市場。你同生意人講文化，等於同食齋嘅和尚講肉幾好食，屌你你係唔係戇撚鳩撩交打？
創作者其實係生意人。要生意佬打某個市場嘅生意，首先要有人睇，有人消費，有人買，有人要，要有錢賺。最起碼唔會餓死自己，維持到光合作用，咁先有得講文化。
係啊，窮起來人就係咁惡，就係寫野咁市儈啦。鬼叫我窮，呢個地方連我呢個小小嘅寫手，都養唔起咩。所以咪要用書面語寫文，寫俾台灣人睇囖。
